தமிழ் நாட்டின் தற்போதைய அரசியல் சூழ்நிலை, தேர்தல் களம் பற்றிய பார்வை மற்றும் கணிப்பு

I. இந்த முயற்சியின் நோக்கம் மற்றும் இலக்கு: 2019 ஆம் ஆண்டு நடைபெறவிருக்கும் தேர்தலில் வாக்காளர்கள் மத்தியில் ஹிந்துத்வ சக்திகளுக்கான ஆதரவை அதிகரித்தல். தமிழ்நாட்டு வாக்காளர்களிடம் குறைந்தபட்சம் 25% ஆதரவை பெறுவதற்கான முயற்சி. தமிழ் நாட்டில் சட்டமன்றத்திற்கான பொதுத் தேர்தல் எப்போது நடைபெற்றாலும் குறைந்த பட்சம் 10% சட்டமன்ற உறுப்பினர்கள் பாரதீய ஜனதா மற்றும் ஹிந்துத்வ கொள்கைகளில் நம்பிக்கை கொண்டவர்களாக தேர்ந்தெடுக்கப்பட, செய்ய வேண்டிய பணிகள்.

II. தமிழ்நாட்டு வாக்காளர்களின் மனநிலை மற்றும் சூழ்நிலை:

  1. தமிழ் நாட்டு வாக்காளர்களில், வாக்களிப்பவர்களில் மூன்றில் ஒரு பங்கு, அதாவது 33% வாக்காளர்கள், தேர்தல் நேரத்தில் கிடைக்கும் பணத்திற்கும், சாராயத்திற்கும், பிரியாணிக்கும், இலவச வீட்டுபயோகப் பொருட்களுக்கும் இலவசங்கள் பற்றிய அறிவிப்புகளுக்கும், இன்னும் பலவிதமான கவர்ச்சிகளுக்கும் மயங்கி வாக்களிக்கும் தன்மை கொண்டவர்கள்.
  2. சினிமாவில் நடித்ததன் மூலம் தங்களுக்குக் கிடைத்துள்ள விளம்பரத்தினால் மக்கள் மத்தியில் பெரிய அளவில் தாக்கத்தை ஏற்படுத்தும் முயற்சியில் ரஜனிகாந்த், கமலஹாஸன் போன்ற பிரபலங்கள் தற்போது அரசியல் களத்தில் இறங்கியுள்ளனர். இவர்களுக்கு மக்கள் மத்தியல் உள்ள செல்வாக்கு 5% – 7% வாக்குகளாக மாற வாய்ப்புள்ளது.
  3. தமிழ் நாட்டின் இன்றைய அரசியல் களத்தில், அரசியலை வியாபாரமாக நடத்தும் தமிழ் மொழி வியாபாரிகளும், தமிழ் இன வியாபாரிகளும், போலி மதச்சார்பின்மை பேசும் வெளி நாட்டுத் தொண்டு நிறுவனங்களின் கைக்கூலிகளும், ஜிஹாதி இஸ்லாமிய பயங்கரவாதிகளின் ஆதரவாளர்களும், கிறிஸ்தவ மதமாற்றுச் சக்திகளின் கைக்கூலிகளான கருப்புச் சட்டையணிந்த போலி நாத்திகவாதிகளும், பாரத நாட்டின் அங்கமான தமிழ் நாட்டை நமது தேசீய நீரோட்டத்திலிருந்து பிரிக்க சதி செய்யும் பல்வேறு சக்திகளும், உரத்த குரலில் நிறைய கூச்சலிடுகிறார்கள். ஹிந்தி எதிர்ப்பு, நரேந்திர மோதியின் மீது விரோதம், ஹிந்துத்வ எதிர்ப்பு, ஜிஎஸ்டி எதிர்ப்பு, நீட் தேர்வு எதிர்ப்பு, பெரிய மதிப்பிலான 500, 1000 ரூபாய் நோட்டுக்கள் மதிப்பிழப்பு, ரஃபேல் விமான ஒப்பந்தம் ஆகிய உணர்ச்சிகளைத் தூண்டும் வெற்று கோஷங்களைத் தவிர்த்த மக்கள் நலன் சார்ந்த எந்தக் கொள்கையும் இவர்களிடம் இல்லை. இவாஞ்செலிஸ்டுகள் மற்றும் ஜிஹாதிகளுடன் இணக்கமாகவும் கிறிஸ்தவ மற்றும் இஸ்லாமிய அடிப்படைவாத கும்பல்களின் அடிவருடிகளாகவும் செயல்படும் திருமாவளவன், சீமான், திருமுருகன் காந்தி, ஜவாஹிருல்லா, வைகோ, மற்றும் பல ஹிந்துத்வ விரோதிகளும் இந்தக் குழுவில் இடம் பெறுகிறார்கள். தமிழகம் முழுவதும் 3% – 3.5% வாக்காளர்கள் இவர்களுக்கு வாக்களிக்கலாம்.
  4. தற்போது தமிழகத்தின் பிரதான கட்சிகளான அதிமுக மற்றும் திமுக கட்சிகளுக்கு, ஏற்கனவே இருந்த வாக்கு வங்கியான 25% மக்கள் ஆதரவு தற்போது சுருங்கிவிட்டது. ஜெயலலிதாவும், கருணா நிதியும் இல்லாத சூழலில் தமிழகத்தை 50 ஆண்டுகாலம் வஞ்சித்த திராவிடக் கட்சிகளின் திறமையற்ற, மெகா ஊழல்கள் மற்றும் மக்கள் விரோதச் செயல்பாட்டை உடைய கட்சிகள் என்ற உண்மையான மக்கள் விரோத முகம் வெளியே தெரிவதால் செய்வதறியாது திகைக்கின்றனர். இன்றைய சூழ்நிலையில், அதிமுக 10%-12% மற்றும் திமுக 10%-12% வாக்குகளை பெறலாம்.

III. வாக்களிப்பவர்களில், மீதமுள்ள 30% வாக்காளர்களின் ஆதரவை முழுமையாகப் பெற்றிட, பாரதீய ஜனதா கட்சி ஊழியர்கள் செய்ய வேண்டியவை. தேர்தலில் நாம் வெற்றி பெறுவதற்கு வகுக்க வேண்டிய வியூகத்திறகான அடிப்படை வேலைகள்:

  1. ஒவ்வொரு சட்டமன்றத் தொகுதியிலும் உள்ள மக்கள் பிரச்சினைகள் கண்டறியப்பட வேண்டும். இதற்காக ஒருங்கிணைந்த மாநிலம் தழுவிய முயற்சி மேற்கொள்ளப்பட வேண்டும். மக்கள் பிரச்சினைகளை கண்டறியும் இந்த முயற்சி நடைபெறுவதைப் பற்றி விரிவான விளம்பரம் செய்யப்பட்டு, சமூக வலைத்தளங்கள், அலைபேசி உள்ளிட்ட மக்கள் தொடர்பு சாதனங்கள், மற்றும் ஹிந்துத்வ களப்பணியாளர்கள் மூலம் இந்தப்பணி செயல்படுத்தப்பட வேண்டும். ஒவ்வொரு தொகுதியிலும் வாக்காளர்களை நேரடியாகத் தொடர்பு கொள்ள வேண்டும். மாநிலம் தழுவிய இந்த முயற்சியின் மூலம் சேகரிக்கப்பட்ட புள்ளி விவரங்கள், ஒருங்கிணைக்கப்பட வேண்டும்.
  2. ஒவ்வொரு சட்டமன்றத் தொகுதி மக்களின் சமூக, பொருளாதார பிரச்சினைகளை கண்டறிந்து, அவற்றை தீர்ப்பதற்கான துல்லியமான சரியான வழிமுறையை, சமுதாய ஊழியர்களுடனும், நிபுணர்களுடனும் கலந்தாலோசித்து முடிவு செய்ய வேண்டும். அந்தத் பகுதி மக்களின் வாழ்க்கைத் தரம் மேம்பட, வளர்ச்சிப் பணிகளுக்கான பரிந்துரைகளையும் நிர்ணயிக்க வேண்டும்.
  3. திரட்டப்பட்ட புள்ளி விவரங்களை ஆய்வு செய்யும் பணி நடைபெற வேண்டும். சட்டமன்றத் தொகுதி வாரியாகப் பெறப்பட்ட விவரங்களை ஆய்வு செய்து, ஒவ்வொரு தொகுதியிலும் கண்டறியப்பட்ட பிரச்சினைகள் பட்டியலிடப்பட்டு, அவற்றுக்கான தீர்வு மற்றும் மக்கள் வளர்ச்சிப் பணிகள் பற்றிய அணுகு முறை தீர்மானிக்கப்பட வேண்டும்.
  4. நமது ஹிந்துத்வ கண்ணோட்டம் மற்றும் சமுதாய முன்னேற்றத்திற்கான வளர்ச்சிப் பணிகளை முன்னெடுத்துச் செல்லக்கூடிய முனைப்புடன் செயல்படுவோருக்குத் தேவையான எல்லாவிதமான பயிற்சிகளையும் அளிக்கக்கூடிய ‘ஹிந்துத்வ களப்பணியாளர்கள் பயிற்சி வகுப்பு’ தமிழ் நாட்டின் அனைத்து மாவட்டங்களிலும் முறையாக நடத்தப்பட வேண்டும். சமுதாய மற்றத்தை நிகழ்த்தவிருக்கும் பயிற்சி பெற்ற ஹிந்துத்வ களப்பணியாளர்கள் ஒவ்வொரு சட்டமன்றத் தொகுதிக்கும் ஆயிரம் பேர் வீதம் தமிழகத்தின் 234 தொகுதிகளுக்கும் பயிற்றுவிக்கப்பட வேண்டும். பாரதீய ஜனதா கட்சி நிர்வாகிகள் மற்றும் ஊழியர்களும் இந்தப் பயிற்சியில் பங்கெடுக்க வேண்டும்.
  5. பயிற்சி பெற்ற ஹிந்துத்வ களப் பணியாளர்களின் செயல்பாட்டை நிர்ணயிக்க அளவுகோல்கள் முடிவு செய்யப்பட வேண்டும். நிர்ணயிக்கப்பட்ட அளவுகோல்களின் அடிப்படயில் களப்பணியாளர்களின் பணியை, அரசியல் பதவியில் ஆசையில்லாத ஹிந்துத்வ வீரர்களின் ஒரு குழு கண்காணித்து கணிக்க வேண்டும்.
  6. ஏற்கனவே தமிழகம் முழுவதும் சேகரிக்கப்பட்ட புள்ளி விவரங்களை அடிப்படையாகக் கொண்டு ஒவ்வொரு தொகுதியையும் பற்றி கணிக்க வேண்டும். ஒவ்வொரு தொகுதியிலும் உள்ள ஹிந்துத்வ செயல் வீரர்களின் செயல்பாடுகளையும் கவனத்தில் கொண்டு தொகுதிகளை மதிப்பிட வேண்டும். இந்த மதிப்பீடுகளின் அடிப்படையில் ஒவ்வொரு தொகுதியிலும் ஹிந்துத்வ சக்திகளின் வெற்றி வாய்ப்பு பற்றிய நிர்ணயம் செய்யப்பட வேண்டும்.
  7. வேட்பாளர்களாக விரும்பும் ஒவ்வொரு தனி நபரின் அரசியல் மற்றும் சமூக செல்வாக்கு போன்ற விஷயங்களை கணிப்பதற்கும், தேர்தலில் வெற்றி பெற வாய்ப்புள்ள வேட்பாளர்களை நிர்ணயிப்பதற்கும், மக்கள் சேவைக்கான வளர்ச்சிப் பணிகளில் வேட்பாளராக விரும்பும் ஒருவர் எந்த அளவிற்கு ஆர்வமாக செயல்படுகிறார் என்பதனை அறிந்துகொள்வதற்கும் , கள நிலவரங்களைப் பற்றிய புள்ளி விவரங்களை அடிப்படையாகக் கொள்ள வேண்டும்..
  8. ஒவ்வொரு தொகுதியிலும் வெற்றிகரமாக மக்கள் பணியில் ஈடுபட்டு, தொகுதியிலுள்ள பெருவாரியான மக்கள் ஆதரவை பெறும் ஹிந்துத்வ செயல் வீரர்களே தொகுதிக்கான வேட்பாளர்களாகத் தேர்வு செய்யப்பட வேண்டும். அரசியல் அனாதைகளாக இருக்கும் ஜாதி உட்பிரிவுகள் கண்டறியப்பட்டு, வேட்பாளர்கள் தேர்வின் போது, அத்தகைய ஜாதி உட்பிரிவைச் சேர்ந்த ஹிந்துத்வ செயல் வீரர்களுக்கு முன்னுரிமை அளிக்கப்பட வேண்டும். மேலே குறிப்பிடப்பட்டுள்ள வழி முறைகளை பின்பற்றி களத்தில் பணி புரிந்தால் தமிழ் நாட்டில் ஹிந்துத்வ சக்திகளுக்கு பலமான அடித்தளமும், தேர்தல்களில் கணிசமான மக்கள் ஆதரவும் கிடைக்கும் என்பதில் எள்ளளவும் சந்தேகமில்லை.

  IV. தேர்தல் வியூகங்கள் மற்றும் யுக்திகள்

  1. தமிழகத்தில் நரேந்திர மோதியின் திட்டங்களினால் பயனடைந்த பயனாளிகள் கண்டறியப்பட வேண்டும். மத்திய நரேந்திர மோதி அரசின் திட்டங்களினால் பயனடைந்தவர்களிடம், தேர்தலில் பாரதீய ஜனதாவிற்கு வாக்களிக்க வேண்டுகோள் விடுக்கப்பட வேண்டும். முறையாக சேகரிக்கப்பட்ட புள்ளி விவரங்களின் அடிப்படையில், நமது சமுதாயத்தின் நாடித்துடிப்பை உணர்ந்த பின்பு, பின் வரும் வழிமுறைகள் பின்பற்றப்பட்டால் ஹிந்துத்வ வேட்பாளர்கள் பாராளுமன்றம் செல்வதை யாராலும் தடுக்க முடியாது.
  2. அரசியல் அனாதைகளாக இருக்கும் சில ஜாதி உட்பிரிவுகள் கண்டறியப்பட்டு அவர்களுக்கு தேர்தலில் பிரதி நிதித்துவம் அளிக்கப்பட வாய்ப்புகள் இருக்கிறதா என்பதை பரிசீலிக்க வேண்டும்.
  3. ஒவ்வொரு தொகுதியிலிருந்தும் பயிற்சி பெற்ற நபர்கள் மக்கள் நலப் பணிகளில் தங்களை ஈடுபடுத்திக் கொள்ள வேண்டும். தேர்ந்தெடுக்கப்பட்ட எந்தப் பதவியிலும் இல்லாத போதும், தேர்தல் இல்லாத நேரத்திலும் மக்கள் நலனில் அக்கறையுடன் பணி செய்வதை கட்சியின் நிர்வாகிகள் ஊக்குவிக்க வேண்டும்.
  4. தேர்தல் அறிவிப்புக்கு முன்பு, பணிசெய்துவரும் அனைத்து நபர்களின் பணிகளையும் பல முறை ஆய்வு செய்து யாருக்கு தொகுதி மக்களிடையே செல்வாக்கு உள்ளது என்பதை கண்டறிய வேண்டும்.
  5. புதிய தமிழகம் கட்சியின் டாக்டர். கிருஷ்ணசாமி, இந்து மக்கள் கட்சியின் திரு. அர்ஜுன் சம்பத், முன்னாள் விஸ்வ ஹிந்து பரிஷத் மாநில அமைப்பாளர் பாஸ்கர், அகில இந்திய முஸ்லீம் முன்னேற்றக் கழகத்தின் சதக்கத்துல்லா ஆகியோரை பாரதீய ஜனதாவில் இணைக்க முயற்சிக்க வேண்டும் அல்லது அவர்களுடன் இணைந்து செயல்பட திட்டம் வகுக்கப்பட வேண்டும்.
  6. ஒவ்வொரு தொகுதியிலும் எந்தெந்த ஹிந்துத்வ பணியாளருக்கு எவ்வளவு மக்கள் ஆதரவு உள்ளது என்பதை கருத்துக் கணிப்பின் மூலம் அறிய வேண்டும். பெருவாரியான மக்கள் ஆதரவை பெற்ற ஹிந்துத்வ ஆர்வலரே வேட்பாளராக்கப்பட வேண்டும். இந்த வழிமுறை கடைப்பிடிக்கப்பட்டால் நிச்சயம் மக்களிடம் ஹிந்துத்வ சக்திகளுக்கான ஆதரவு பெருகும்.
  7. தமிழகம் முழுவதிலும் ஒவ்வொரு மாவட்டத்திலும், களப்பணியில் ஈடுபட்டுள்ள குழுவினர், அடிமட்டத் தொண்டர்களின் எண்ணங்களையும், மக்கள் மன ஓட்டத்தையும் 15 நாட்களுக்கு ஒரு முறை கணித்து, மாநிலத் தலைமை அலுவலகத்திற்கு அறிக்கை மூலம் தெரிவிக்க வேண்டும்.

  R Varadarajan – Thiruchirappalli

Do you like this Article? Subscribe here to our Email Listing

* indicates required

Leave a Reply

%d bloggers like this: